Die musiek wat ons laat sing, dans of neurie is in ons harte ingemessel as deel van ons musikale erfenis

TIEN DAE VAN ERFENIS – DAG 8 : 22 SEPTEMBER 

Die musiek wat ons laat sing, dans of neurie is in ons harte ingemessel as deel van ons musikale erfenis. Vandag besing ons dié skat!

  • Die woorde vir die bekende kinderliedjie “Siembamba” is geskryf deur C.J. Langenhoven. Hy was onder andere ook die skrywer van “Aai, aai die witborskraai”, “Jan Pierewiet” en “Pollie ons gaan Pêrel toe”. Daar is nie eenparigheid oor die betekenis van “Siembamba” nie, maar die teorieë is nietemin interessant. Talle glo dat die woord Siembamba eintlik ’n omvorming van die woorde “sien die mamba” is en dat die liedjie dus as ’n waarskuwing vir kinders dien oor die gevare van slange. As hierdie teorie aanvaar word, sou dit die wreedheid van die res van die liedjie ietwat versag, want dan is dit minstens ’n mamba van wie die nek omgedraai en die kop vermorsel moet word.
  • Die geliefde Afrikaanse kinderliedjie “Dapper muis” is oorspronklik in 1974 deur die sangpaar Dawie en Doortjie (oftewel die operasanger Dawie Couzyn en Doris Brasch) opgeneem. Dit is eintlik oorspronklik in Engels geskryf – deur Betty Misheiker – maar die skrywer het dit later vertaal en aan die dagblad Beeld erken dat die liedjies “huis toe gekom het in hul vertalings.”
  • “Sarie Marais” is die Afrikaanse weergawe van die Amerikaanse liedjie “Sweet Ellie Rhee” wat na bewering uit die Amerikaanse Burgeroorlog dateer. Sarie was blykbaar die oudste dogter van Jacob Philippus Maré en Cornelia Susanna Jacoba Erasmus. Haar doopnaam was Susara Margaretha Maré en is op 15 April 1869 op die plaas Eendracht in die Heidelberg-distrik gebore.