Toon al 2 resultate

Pieter de Jager is ’n Wes-Transvaler in murg en been. Hierdie boer van die Ottosdal-distrik het nog altyd ’n lewendige belangstelling in die geskiedenis en die mense van sy omgewing gehad. Sy passie het neerslag gevind in verskeie publikasies, onder meer Wes-Transvaal: Militêre brandpunt van die Anglo-Boereoorlog, 1899-1902 wat in 2018 by Kraal Uitgewers verskyn het.

Pieter Jacobus de Jager is in 1937 op die plaas Driekuil gebore. Hy behaal ’n graad in staatsleer en geskiedenis aan die Potchefstroomse Universiteit vir Christelike Hoër Onderwys (Noordwes-Universiteit) en keer dan terug na die familieplaas waar hy tot 2009 voltyds geboer het.

Sy liefde vir geskiedenis was egter onblusbaar. Tussen die boerdery deur was hy aktief betrokke by die destydse Wes-Transvaalse Krygshistoriese Vereniging, die Argief vir Wes-Transvaalse Geskiedenis by die Potchefstroomse Universiteit en die Raad vir Nasionale Gedenkwaardighede. Hy het vir die Stigting Simon van der Stel opnames gedoen van bewaringswaardighede in Wes-Transvaal, spesifiek in Lichtenburg, Zeerust en die Marico-distrik. As toergids het hy ook gereeld toeriste en skoolgroepe na historiese slagvelde in Noordwes vergesel, en sy uitgebreide kennis met hulle gedeel. De Jager se boek Die Korannafonteiners: Stories oor Ottosdal en sy mense (2008, Protea Boekhuis) getuig van sy liefde vir die geskiedenis en sy kontrei.

Wes-Transvaal: Militêre brandpunt van die Anglo-Boereoorlog, 1899-1902 is die sewende en laaste boek in Kraal Uitgewers se Die erwe van ons vaad’re-reeks (onder redaksie van A.W.G. Raath). Daarin val die fokus op prominente én minder bekende veldslae en skermutselings wat in die destydse Wes-Transvaal afgespeel het. Die leser leer ken ook bekende Boereleiers, soos generaals Koos de la Rey, Jan Kemp, Jan Celliers, Swart Sarel du Toit en Ou Hartjie de Villiers. Hierdie publikasie is die resultaat van meer as 30 jaar se navorsing en span die kroon op De Jager se historiese skryfwerk.

Hy en sy vrou woon deesdae in ’n aftreeoord in Pretoria.