Toon al 1 resultate

Zelda Rowan

Dit is altyd jammer as navorsing van hoogstaande gehalte iewers op ’n rak bly lê en stof vergader. Daarom is dit verblydend dat Zelda Rowan se navorsing oor Nonnie de la Rey in 2016 in ’n treffende boek verwerk en toeganklik gemaak is vir ’n wyer leserspubliek.

Rowan verwerf in 2003 haar MA-graad in kultuurgeskiedenis met lof aan die Universiteit van Pretoria. Haar verhandeling handel oor Nonnie de la Rey, die eggenote van die bekende Boeregeneraal Koos de la Rey. Sy het ’n passie vir kultuurgeskiedenis en wou graag navorsing doen oor ’n vrou wat die Anglo-Boereoorlog meegemaak het. Nonnie de la Rey: Pionier van die Wes-Transvaal, 1856-1923 was die eerste boek in Kraal Uitgewers se Kraal Histories-reeks met die vooraanstaande historikus Fransjohan Pretorius as die reeksredakteur.

Sy was ook ’n medewerker aan Die oorlog kom huis toe: Vroue en gesinne in die Anglo-Boereoorlog wat in 2013 by Tafelberg verskyn het. Hierdie publikasie, onder redaksie van Albert Grundlingh en Bill Nasson, is in 2014 met die eerste kykNET-Rapportboekprys vir niefiksie bekroon. Rowan se bydrae oor Nonnie de la Rey is ook ingesluit in Hartskombuis: Boerekos van die Anglo-Boereoorlog tot vandag (2016).
Soos Nonnie is Zelda ’n vrou wat kan sterk staan en druk haar stempel op verskeie terreine af. Afgesien van haar skryfwerk, gebruik sy ook haar kundigheid en veelsydigheid in die uitgewersbedryf, verkope en bemarking.