Verloor jouself in die woord- en digkuns van toentertyd tot nou, van Langenhoven tot Bibi Slippers

TIEN DAE VAN ERFENIS – DAG 3 : 17 SEPTEMBER

Verloor jouself in die woord- en digkuns van toentertyd tot nou, van Langenhoven tot Bibi Slippers.

Drie feestelike feite oor… Ons digkuns

• N.P. van Wyk Louw se bekende gedig “Raka” is in 1941 gepubliseer. Daar is vir lank gegis oor wie of wat Raka eintlik is. Volgens Danie Langner van die FAK beteken die woord “raka” onder meer “domkop, die leë een, ’n idioot, niks” in Aramees en Grieks. Dit is ook ’n kragwoord wat beteken: Ek spoeg op jou. Volgens die skrywer het die karakter eintlik ’n baie veelsydige betekenis.

• Die jong Afrikaanse joernalis en skrywer, Bibi Slippers, se debuutbundel fotostaatmasjien is reeds met die Eugène Marais-prys, die UJ-debuutprys, die Elisabeth Eybers-prys en ’n ATKV-Woordveertjie (Prys vir Poësie) vereer. Die gewildste gedig uit dié bundel is “Punt”:

ek skryf jou af en eindig
ons verhaal met ʼn punt
agter jou naam.
finaal.

maar dis altyd so met my
as ek my weer kom kry
is daar nog twee punte by

• Die werk wat as die eerste liriese Afrikaanse gedig bestempel word, “Winter Nag”, is geskryf deur Eugène Marais en is in die Land en Volk van 23 Junie 1905 gepubliseer. Dit het soos volg gelees (en is later hier en daar aangepas tot die “Winternag” wat ons vandag ken):

Koud is die windjie,
en schraal!
En blink in die doflig
en kaal –
zó wijd as die Heer se genade –
die velde in sterlig en schade.
En hoog op die rande,
verspreid in die brande,
is die gras-zaad aan’t roere zo’s wenkende hande.

(Bronne: Maroela Media, FAK-Afrikanergeskiedenis)

Vier Afrikaans by Kraal Uitgewers
Sommige mense word met ’n goue lepel in die mond gebore; ander met ’n witbrood onder die arm – die Louw-broers is waarskynlik met ’n gedig in die hart en ’n pen in die hand gebore. Die nalatenskap van die skrywer-broers N.P. van Wyk en W.E.G. Louw is ’n skatkis van diepe woordkuns. Hulle voetstappe het in die koue Karoo-dorpie, Sutherland, begin, maar sou uiteindelik veel verder strek. Hulle werk word beskou as van die beste nóg wat in Afrikaans gelewer is. Nou kan jy ook, as deel van Kraal Uitgewers se Louw-broers-produkte, ’n stukkie van hierdie skatkis besit. Klik hier vir meer inligting oor ons Louw-produkte.