Woord van die week – 19 Februarie 2018

skobbejak s.nw., skobbejakke.

Skurk, of oneerbare, ongemanierde, niksbeduidende persoon: “Hy is die wêreld se grootste Don Juan – en sy onbeskofste skobbejak” (A.P. Brink, uit Pot-pourri, 1962, bl. 12).

“Jy kry jou goeie ouens, jou wonderlike ouens, die donker, buierig introspektiewe ouens, die omstrede ouens, die skobbejakke.” (Uit Beeld, 13 Desember 2001, bl. 26).

Uit Nederlands “schobbejak” (1619), ’n samestelling van “schobben” wat beteken “krap, vryf” en “jak” wat beteken “kort baadjie”. “Schobbejak” ontstaan waarskynlik na aanleiding van hawelose mense wat luise of skilfers uit hulle klere geskud het en moes steel om kos in die hande te kry.